JioFiber Plans: என்னென்ன திட்டங்கள்? என்ன விலை? என்னென்ன இலவசங்கள்? (முழு விபரங்கள்)

மொத்தம் ஆறு திட்டங்கள்; 100 ஜிபி முதல் 5000 ஜிபி வரை; ஒரு மாதம் முதல் இரண்டு ஆண்டுகள் வரை; யாருக்கெலாம் என்னென்ன இலவசங்கள் கிடைக்கும்? முழு விபரங்கள் இதோ!

முகேஷ் அம்பானி தலைமையிலான டெலிகாம் நிறுவனமான ரிலையன்ஸ் ஜியோ "ஒருவழியாக" மிகவும் எதிர்பார்க்கப்பட்ட அதன் ஃபைபர் அடிப்படையிலான பிராட்பேண்ட் சேவையின் - ரிலையன்ஸ் ஜியோ ஃபைபர் - திட்டங்களையும், விலை நிர்ணயங்களையும் மற்றும் அதன் நன்மைகளையும் அறிவித்துள்ளது.

நீண்ட காத்திருப்புக்கு பின் ஜியோ ஃபைபர் திட்டங்களின் விலை மற்றும் திட்டங்கள் எங்களின் கைகளுக்கு எட்டியுள்ளது, ஆர்வமுள்ள நுகர்வோர்கள் இனி காத்திருக்க தேவையில்லை. என்னென்ன திட்டங்கள், என்னென்ன விலைகளின் கீழ், என்னென்ன நன்மைகளை வழங்குகிறது?

குறிப்பாக ஜியோ வழங்கும் இலவச எச்டி டிவி ஆனது யாருக்கெல்லாம் கிடைக்கும்? போன்ற விவரங்களை அறிந்து கொண்டு "சட்டுபுட்டென்று" ஒரு ஜியோ பிராட்பேண்ட் பிளானை தேர்ந்து எடுங்கள்!

ரிலையன்ஸ் ஜியோ ஃபைபர் சேவையின் கீழ், மொத்தம் 6 திட்டங்கள் கிடைக்கின்றன. மிகவும் மலிவு விலையிலான திட்டமான ப்ரான்ஸ் தொடங்கி சில்வர், கோல்ட், டயமண்ட், பிளாட்டினம் என நீண்டு மிகவும் விலை உயர்ந்த திட்டமான டைட்டானியம் வரை நீள்கிறது.

ஜியோ ஃபைபர் ப்ரான்ஸ்:

ரிலையன்ஸ் ஜியோ ஃபைபரின் முதல் திட்டம் ரூ.699 ஆனது ப்ரான்ஸ் (Bronze) என்று அழைக்கப்படுகிறது. இது 100Mbps வேகத்திலான 100 ஜிபி அளவிலான டேட்டாவை வழங்கும். அறிமுக சலுகையாக, இந்த திட்டத்தின் கீழ் கூடுதலாக 50 ஜிபி டேட்டா கிடைக்கும். அதாவது மொத்தம் 150 ஜிபி அளவிலான மாதாந்திர டேட்டா நன்மை கிடைக்கும். டேட்டா வரம்பு முடிந்த பின்னர் இணைய வேகமானது 1 Mbps ஆகக் குறைக்கப்படும்.

ஜியோ ஃபைபர் சில்வர்:

ரிலையன்ஸ் ஜியோ ஃபைபரின் இரண்டாவது திட்டம் ரூ.849 ஆனது சில்வர் (Silver) என்று அழைக்கப்படுகிறது. இது 100Mbps வேகத்திலான 200 ஜிபி அளவிலான டேட்டாவை வழங்கும். அறிமுக சலுகையாக, இந்த திட்டத்தின் கீழ் கூடுதலாக 200 ஜிபி டேட்டா கிடைக்கும். அதாவது மொத்தம் 400ஜிபி அளவிலான மாதாந்திர டேட்டா நன்மை கிடைக்கும். டேட்டா வரம்பு முடிந்த பின்னர் இணைய வேகமானது 1 Mbps ஆகக் குறைக்கப்படும்.

ஜியோ ஃபைபர் கோல்ட்:

ரிலையன்ஸ் ஜியோ ஃபைபரின் மூன்றாவது திட்டம் ரூ.1,299 ஆனது கோல்ட் (Gold) என்று அழைக்கப்படுகிறது. இது 250Mbps வேகத்திலான 500 ஜிபி அளவிலான டேட்டாவை வழங்கும். அறிமுக சலுகையாக, இந்த திட்டத்தின் கீழ் கூடுதலாக 250 ஜிபி டேட்டா கிடைக்கும். அதாவது மொத்தம் 750 ஜிபி அளவிலான மாதாந்திர டேட்டா நன்மை கிடைக்கும். டேட்டா வரம்பு முடிந்த பின்னர் இணைய வேகமானது 1 Mbps ஆகக் குறைக்கப்படும்.

ஜியோ ஃபைபர் டயமண்ட்:

ரிலையன்ஸ் ஜியோ ஃபைபரின் நான்காவது திட்டம் ரூ.2,499 ஆனது டயமண்ட் (Diamond) என்று அழைக்கப்படுகிறது. இது 500Mbps வேகத்திலான 1250 ஜிபி அளவிலான டேட்டாவை வழங்கும். அறிமுக சலுகையாக, இந்த திட்டத்தின் கீழ் கூடுதலாக 250 ஜிபி டேட்டா கிடைக்கும். அதாவது மொத்தம் 1500 ஜிபி அளவிலான மாதாந்திர டேட்டா நன்மை கிடைக்கும். டேட்டா வரம்பு முடிந்த பின்னர் இணைய வேகமானது 1 Mbps ஆகக் குறைக்கப்படும்.

ஜியோ ஃபைபர் பிளாட்டினம்:

ரிலையன்ஸ் ஜியோ ஃபைபரின் ஐந்தாவது திட்டம் ரூ.3,999 ஆனது பிளாட்டினம் (Platinum) என்று அழைக்கப்படுகிறது. இது 1 Gbps வேகத்திலான 2500 ஜிபி அளவிலான டேட்டாவை வழங்கும். இதில் கூடுதல் டேட்டா நன்மைகள் எதுவும் கிடையாது. இந்த டேட்டா வரம்பு முடிந்த பின்னர் இணைய வேகமானது 1 Mbps ஆகக் குறைக்கப்படும்.

ஜியோ ஃபைபர் டைட்டானியம்:

ரிலையன்ஸ் ஜியோ ஃபைபரின் ஆறாவது திட்டம் ரூ.8,499 ஆனது டைட்டானியம் (Titanium) என்று அழைக்கப்படுகிறது. இது 1 Gbps வேகத்திலான 5000 ஜிபி அளவிலான டேட்டாவை வழங்கும். இந்த திட்டத்தின் கீழும் எந்த விதமான கூடுதல் டேட்டா நன்மைகளும் கிடையாது. இந்த டேட்டா வரம்பு முடிந்த பின்னர் இணைய வேகமானது 1 Mbps ஆகக் குறைக்கப்படும்.

இணைய சேவைகளை தவிர்த்து வேறென்ன நன்மைகள் கிடைக்கும்?

ஒவ்வொரு ஜியோ ஃபைபர் திட்டங்களும் நிறுவனத்தின் ஹோம் போன் லேண்ட்லைன் சேவை, டிவி வீடியோ அழைப்பு, கேமிங் மற்றும் நார்டன் வைரஸ் தடுப்பு வழியாக 5 சாதனங்கள் வரையிலான டிவைஸ் செக்யூரிட்டி, இலவச உள்நாட்டு குரல் அழைப்பு போன்ற நன்மைகளை வழங்குகிறது. குறிப்பாக, ஜியோ ஃபைபர் பிளாட்டினம் மற்றும் டைட்டானியம் திட்ட பயனர்கள் ஜியோ விஆர் இயங்குதளம், ஜியோ First-Day First-Show திரைப்பட சேவை மற்றும் ஸ்பெஷல் ஸ்போர்ட்ஸ் கன்டன்ட் உள்ளடக்கம் ஆகியவற்றிற்கான அணுகலைப் பெறுவார்கள்.

ஜியோ ஃபைபர் வெல்கம் ஆபர்!

நிறுவனம் தனது JioForever ஆண்டு திட்டங்களை தேர்ந்தெடுக்கும் புதிய ஜியோ ஃபைபர் வாடிக்கையாளர்களுக்கு அதன் வெல்கம் ஆபரின் கீழ் பல இலவச சாதனங்களை தொகுத்துள்ளது. இந்த சலுகையானது இலவச ஜியோ ஹோம் கேட்வே சாதனம் (ரூ.5,000 மதிப்புடையது), ஜியோ 4 கே செட் டாப் பாக்ஸ் (ரூ.6,400 மதிப்புடையது), இரண்டு மாத கூடுதல் சேவை மற்றும் டபுள் டேட்டா ஆகியவற்றை வழங்கும்.

கூடுதலாக, இந்த சலுகையானது ப்ரான்ஸ் சந்தாதாரர்களுக்கான ஜியோசினிமா மற்றும் ஜியோசாவ்ன் ஆப்ஸ்களுக்கான மூன்று மாத இலவச அணுகலையும் வழங்குகிறது. சில்வர் திட்ட சந்தாதாரர்களுக்கு OTT பயன்பாடுகளுக்கான மூன்று மாத சந்தாவையும், கோல்ட், டயமண்ட், பிளாட்டினம் மற்றும் டைட்டானியம் திட்ட சந்தாதாரர்களுக்கு OTT பயன்பாடுகளுக்கான இலவச வருடாந்திர சந்தாவையும் வழங்குகிறது. இந்த சந்தாவின் கீழ் எந்தெந்த OTT ஆப்ஸ்கள் சேர்க்கப்படும் என்பதில் தெளிவு இல்லை.

மேலும், ஜியோ ஃபோர்வர் கோல்ட் ஆண்டு திட்டத்திற்கான ஜியோ ஃபைபர் சந்தாதாரர்களுக்கு இலவச மியூஸ் 2 ப்ளூடூத் ஸ்பீக்கர் கிடைக்கும். இதேபோல்,சில்வர் ஆண்டு திட்ட சந்தாதாரர்களுக்கு தம்ப் 2 ப்ளூடூத் ஸ்பீக்கர்கள் இலவசமாக கிடைக்கும். டயமண்ட் மற்றும் பிளாட்டினம் ஆண்டு திட்ட சந்தாதாரர்களுக்கு இலவச எச்டி டிவி கிடைக்கும் (ஒவ்வொரு திட்டத்திற்கும் வெவ்வேறு திரை அளவிலான டிவிக்கள் கிடைக்கும்). 

கோல்ட் திட்ட சந்தாதாரர்களுக்கு இலவசமாக 24 இன்ச் எச்டி டிவி கிடைக்கும், ஆனால் அவர்கள் இரண்டு ஆண்டுகளுக்கான திட்டத்தை பெற வேண்டும். டைட்டானியம் ஆண்டு திட்டத்தை தேர்வு செய்தால் மட்டுமே 43 இன்ச் அளவிலான 4 கே டிவி இலவசமாக கிடைக்கும்.

குறிப்பிட்ட திட்டத்தை ஆறு மாத காலம் தேர்வு செய்தால் ஒரு மாத காலம் கூடுதல் சேவையும் மற்றும் 50 சதவீதம் கூடுதல் டேட்டாவும் கிடைக்கும். அதுவே 3 மாதகாலம் தேர்வு செய்தால் 25 சதவீத கூடுதல் டேட்டா கிடைக்கும்.